Matriks

Die digter se poging tot lewe-deur-poesie, tot skrywende sinmaak uit wat tans gebeur en gebeur het en die ewige wordingsproses van 'n skrywerslewe kom in hierdie ryk bundel aan bod, met al die elemente wat aanhangers van 'n Hambidge-bundel verwag: Die verhouding met die ouers en familie, gesprekvoering met ander skrywers, liefdesverhoudings en hul eindes, reise na verre plekke en gedigte met beelde en bekende sterftes as vertrekpunt. En altyd 'n flink digterlike reaksie op gebeure wat die tydvak ontwrig of ontstem, veral waar dit afskeid en aflegging behels.